Bakı Dövlət Universitetinin (BDU) keçmiş rektoru akademik Abel Məhərrəmov Xaçmaz rayonundakı hotelinə görə məhkəməyə verilib. Bu barədə ShimalNews 19 aprel tarixində “Qaynarinfo”ya istinadən məlumat verir.
Abel Məhərrəmov və onun xanımına qarşı Nazim Əmirov adlı şəxs iddia qaldırıb. Onun tələbi torpaq sahəsinin boşaldılması və qanunsuz tikilinin sökülməsi ilə bağlıdır. Eləcə də İlqar Tağıyev və Nizami Tağıyev də iddiaçı tərəfdən məhkəməyə veriliblər. Lakin 1-ci instansiya məhkəməsi iddianı təmin etməyib. Növbəti proses Sumqayıt Apellyasiya Məhkəməsində mayın 7-də olacaq. İş hakim Fuad Məmmədovun icraatındadır.
Məlumata görə, məsələ Abel Məhərrəmovun Seyidlikəndyeri kəndindəki hoteli ilə bağlıdır. Bu hotelin tikintisinə 2008-ci ildə icazə verilib.
Ərazi olaraq, obyekt Nabran bələdiyyəsinin ərazisi hesab edilir. Bir neçə il əvvəl mediada yayılan məlumatlarda bildirilirdi ki, "El Faro hotel Nabran" Abel Məhərrəmova məxsusdur. Tikilinin 200 hektar ərazidə yerləşərək 61 milyon manat dəyərində olduğu iddia edilir.
Məsələ ilə bağlı Abel Məhərrəmovun mövqeyini öyrənmək mümkün olmayıb.
