Direktorların işə qəbulu müsabiqəsinin test imtahanı mərhələsi Qubada keçiriləcək. Bu haqda ShimalNews 13 iyul tarixində Quba-Xaçmaz Regional Təhsil İdarəsinə istinadən məlumat verir.
Şagird sayı 151-dən 500 nəfərədək olan ümumi təhsil müəssisələrində vakant yerlər üçün seçim müsabiqəsi aparılacaq.
İyulun 15-də, saat 10:00-da 2 nömrəli tam orta məktəb-liseydə test imtahanı mərhələsi keçiriləcək. İştirak hüququ qazanan namizədlərə telefon vasitəsilə məlumat bildiriləcək.
İmtahanın keçirilmə müddəti 80 dəqiqədir. Namizədlərə tənqidi oxu bacarığı üzrə 15, riyazi və məntiqi düşünmə üzrə 15, təhsil qanunvericiliyi üzrə 15 sual olmaqla 45 test tapşırığı təqdim ediləcək.
İmtahanda iştirak edəcək namizədlər imtahan başlamadan 30 dəqiqə əvvəl binaya daxil olmalıdırlar. Onların üzərində şəxsiyyəti təsdiq edən sənəd olmalıdır.
