Şimal bölgəsində fəaliyyət göstərən regional yerüstü televiziya yayımçıları ilə Xaçmaz şəhərində dəyirmi masa təşkil olunub. Bu haqda ShimalNews 14 iyul tarixində Azərbaycan Respublikası Audiovizual Şurasına istinadən məlumat verir.
Burada Şura aparatının nümayəndələri, "ARB Şimal", "ARB Günəş", "Qafqaz TV" televiziya kanallarının ümumi proqram rəhbərlikləri və xəbər redaksiyalarının məsul əməkdaşları iştirak ediblər.
Onlar uşaqların zərərli informasiyadan qorunması ilə bağlı həyata keçirilən tədbirlərin işıqlandılrılması və maarifləndirmə işlərinin aparılması, uşaqlara qarşı hər cür zorakılığın mənfi nəticələri haqqında maarifləndirmə tədbirlərinin televiziya kanallarında işıqlandırılmasının əhəmiyyəti, habelə erkən nikah və qohumlar arasında nikah hallarının qarşısının alınması sahəsində regional televiziya kanallarının rolu mövzularında müzakirələr aparıblar.
Şura nümayəndələri maarifləndirici proqramların təşkil edilməsi, sosial çarxların yayımlanması və bu yayımlar haqqında Şuraya hesabatların təqdim olunması sahəsində yayımçılara vəzifələrini və görüləcək tədbirləri izah ediblər.
Bu görüş "Uşaqlara dair Strategiya"nın həyata keçirilməsi üzrə 2020-2025-ci illər üçün və Azərbaycan Respublikası Audiovizual Şurasının 2021-2023-cü illər üçün Kommunikasiya Strategiyasının həyata keçirilməsi üzrə 2022-ci ilin fəaliyyət planlarına uyğun olaraq keçirilib.
