Quba və Xaçmaz rayonlarının dövlət xəstəxanaları ən çox xidmət göstərmiş tibb müəssisələrinin ilk onluğuna daxil olublar. Bu barədə ShimalNews 25 iyul tarixində İcbari Tibbi Sığorta üzrə Dövlət Agentliyinə istinadən məlumat verir.
2022-ci ilin iyun ayında icbari tibbi sığorta çərçivəsində TƏBİB-in tabeliyindəki tibb ocaqlarında vətəndaşlara göstərilən xidmətlərlə bağlı statistik göstəricilər açıqlanıb.
Beləliklə, ölkə üzrə qeydə alınan ümumi müraciət sayının 58 %-i və göstərilən tibbi xidmətlərin 57 %-i regionların payına düşüb.
Tibbi xidmətlərin 84 %-i ambulator, 16 %-i stasionar şəraitdə göstərilib. Pasiyentlərin 29 %-ni uşaqlar, 71 %-ni isə böyüklər təşkil edib.
Pasiyentlərin müraciəti əsasən ümumi tibbi müayinə, endokrin sistemin xəstəlikləri, qan dövranı sistemi xəstəlikləri, tənəffüs sistemi xəstəlikləri, sümük və əzələ sisteminin və birləşdirici toxumanın xəstəlikləri, həzm sisteminin xəstəlikləri, sidik-cinsiyyət sisteminin xəstəlikləri, göz və gözün əlavə aparatının xəstəlikləri, zədələr və zəhərlənmələr, habelə sinir sistemi xəstəlikləri ilə bağlı olub.
Vətəndaşlara verilmiş göndərişlər əsasında müqaviləli tibb müəssisələri tərəfindən tibbi xidmətlərin göstərilməsi və onların elektron reyestrdə qeydiyyatı cari ilin yanvar-may ayları üzrə davam edir.
