Quba rayonunun Atuc kənd sakini Xaçmaz rayonunda tanışının cibindən 1400 manat pul oğurlayıb. Bu barədə ShimalNews 17 iyun tarixində Publika.az-a istinadən məlumat verir.
Xaçmaz Rayon Məhkəməsində keçirilən prosesdə 44 yaşlı Əzim Əzizov oğurluq maddəsi ilə (Cinayət Məcəlləsi m.177) həbs olunub. Ona 2 il azadlıqdan məhrumetmə cəzası kəsilib.
Araşdırılma zamanı məlum olub ki, Əzim Xaçmaz şəhərinə iş axtarmağa gəlib. Bu məqsədlə çörəkbişirmə sexinin sahibi Vahid adlı şəxsə yaxınlaşıb. İş adamı ona sexdə iş olmadığını deyib. Lakin Armudpadar kəndində yerləşən bağ evində həyətdə işləyib, orada qala biləcəyini söyləyib.
Bundan sonra Əzim həmin bağa gedib və orada mühafizəçi kimi qalan İsmayıl adlı pensiyaçı ilə birgə işləməyə və eyni otaqda qalmağa başlayıb.
Əzim İsmayılın yatmasından istifadə edərək, onun aylarla yığıb üzərində saxladığı 1400 manatı gecə saat 3:00 radələrində götürərək qaçıb. O, Quba rayonunda yaşadığı evə qayıdıb. Həmin pulu işləyərək qazandığını deyib və həmin vəsaitlə qızına toy edib.
Məhkəmədə zərərçəkən şəxs İsmayıl oğurluq pulları Əzimin qaytarmadığını deyib və onun həbs edilməsini tələb edib.
