Şabran Rayon Məhkəməsində xuliqanlıqda və qəsdən sağlamlığa az ağır zərər vurmada təqsirləndirilən Namiq Bəşirzadənin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın məlumatına görə, məhkəmənin hökmü ilə ona 1 il 2 ay 28 gün müddətinə azadlığın məhdudlaşdırılması (elektron qolbaq) cəzası təyin edilib.
İttihama görə, hadisə bir neçə ay bundan əvvəl Şabran rayonunun Əmirxanlı kəndi ərazisində qeydə alınıb.
Belə ki, kənd sakini, 2007-ci il təvəllüdlü Namiq Bəşirzadə küçə ilə gedərkən sinif yoldaşı, 2008-ci il təvəllüdlü, zərərçəkmiş Samir Həmidzadə (adı, soyadı şərtidir) ilə öz arasında qəsdən mübahisə yaradıb. Sonra o, xuliqanlıq niyyəti ilə zərərçəkmiş şəxsi yumruqla sol göz nahiyəsinə, təpiklə baş nahiyəsinə vuraraq yerə yıxıb və burnunu sındırıb.
