Bu gün şəhid İsaxan Qanıyevin doğum günüdür.
İsaxan İsaman oğlu Qanıyev 1985-ci il noyabrın 11-də Şamaxı şəhərində anadan olub. Ailəli idi. Ondan üç oğul, bir qız övladı yadigar qalıb.
Azərbaycan Ordusunun giziri olan İsaxan Qanıyev 2020-ci il sentyabrın 27-də başlayan Vətən müharibəsində iştirak edib. O, müharibənin ilk günü - sentyabrın 27-də Tərtər istiqamətində gedən döyüşlərdə şəhid olub. Şamaxı Şəhidlər xiyabanında dəfn edilib.
Şəhidin atası İsaman Qanıyev oğlunun müharibəyə getmək istəyindən danışarkən deyib:
"O, orduya yazılanda biz çox söz-söhbət etdik ki, sən getmə, oğul. Bir polkovnik qohumumuz vardı, məndən xahiş etdi ki, bu uşağa icazə ver, getsin. Mən istəyirdim oğlumu Bakıya qaytarım, amma onun fikri yalnız müharibədə iştirak etmək və torpaqlarımızın azad olunması idi.
Biz 2020-ci il sentyabrın 26-da danışmışdıq. Elə sevincək idi. Dedi: "Ata, ayın 27-si başlayacağıq". Oğlum sevə-sevə getdi ölümə. Çox sevirdi Vətəni, bu torpağı, milləti".
İsaxan Qanıyev ölümündən sonra "Vətən uğrunda", "Laçının azad olunmasına görə", "Suqovuşanın azad olunmasına görə" medalları və III dərəcəli "Vətənə xidmətə görə" ordeni ilə təltif edilib.
