Shimal.News-un əldə etdiyi məlumata görə, bu sözləri məhkəmə qarşısında yetkinlik yaşına çatmayan qıza qarşı seksual xarakterli zorakılıq hərəkətləri etməkdə təqsirləndirilən Cahid Piriyev (ad şərtidir) deyib.

Belə ki, 1995-ci il də Qusarda anadan olan Cahid Piriyev işləmək üçün Rusiyaya gedib. Orada olan zaman sərxoş vəziyyətdə yetkinlik yaşına çatmayan, 2004-cü il təvəllüdlü rusiyalı Kristina Rzayevaya (ad şərtidir) qarşı seksual hərəkətlər edib. Nəticədə qızın razılığı olmadan onunla intim münasibətdə olub.

Təqsirləndirilən şəxsə qarşı Cinayət Məcəlləsinin 149.2.3-cü (Uşaqlara qarşı cinsi istismar və ya cinsi zorakılıqla bağlı cinayətə görə) maddəsi ilə cinayət işi açılıb. Məhkəmə istintaqına Sumqayıt Ağır Cinayətlər Məhkəməsində baxılıb.

Məhkəmə istintaqı zamanı təqsirləndirilən Cahid Piriyevə ifadə vermək üçün şərait yaradılıb. O, törətdiyi əməldə özünü təqsirli bilməyib. İfadəsində qeyd edib:

“2017-ci ildə işləmək üçün Rusiya Federasiyasına getdim. Orada bibim oğluna məxsus mağazada Kristina ilə tanış oldum. 3 il ərzində Kristina və digər dostlarımızla bərabər tez-tez yeyib-içməyə, istirahət etməyə gedirdik. Hadisə baş verən günü həmişəki kimi konteynerdə yeyib-içirdik. Kristina ilə digər dostumuz dava etməyə başladılar, bu zaman özlərinə xəsarət də yetirdilər. Hadisədən sonra mən konteynerdə yatmışdım. Səhər saat 8-də polis əməkdaşları konteynerdə məni ağzı üstə yerə yıxıb qandallayaraq polis idarəsinə apardılar. Mənə dedilər ki, Kristinanı zorladığım üçün tutulmuşam. Kameralara baxdıqdan sonra günahsız olduğum müəyyənləşdi. Sərbəst buraxıldım. Qonşumuzla problemim var idi, düşünürəm ki, o edib”.

Cahid Piriyevin istintaqdakı ifadəsi ilə məhkəmədəki ifadəsi arasında ziddiyyətlər olub. Belə ki, o, istintaqdakı ifadəsində çox içkili olduğu üçün Kristinaya gözü düşdüyünü, onun icazəsi olmadan zorladığını etiraf edib. Kristina müqavimət göstərsə də, onu müqavimətini qırdığını qeyd edib.

Məhkəmənin gedişatında zərərçəkmiş Kristina Rzayeva dindirilib. O, ifadəsində göstərib:

“Cahid mənə birlikdə yük maşınında gəzməyi təklif etdi. Özüm də darıxırdım deyə təkliflə razılaşdım. Cahid yük maşınını torpaq yola, tənhalıq yerə sürdü. Torpaq yolda dayanıb siqaret çəkmək istədiyini dedi. Siqaret çəkəndən sonra Cahid mənə yaxınlaşıb öpüb, qucaqlamaq istədi. Mən də itələdim. Amma gücüm çatmadı. Mənimlə zorla cinsi əlaqədə oldu”.

Məhkəmə-psixoloji ekspertizasının rəyinə əsasən, təqsirləndirilən şəxsdə hər hansı psixi xəstəliyin əlamətləri aşkar olunmayıb.

Sonda məhkəmənin yekun qərarı ilə Cahid Piriyev 8 il müddətində azadlıqdan məhrum edilib. O, azadlıqdan məhrumetmə cəzasını ümumi rejimli cəzaçəkmə müəssisəsində çəkəcək.

Fidan İlqar