Qusarlı idmançı sərbəst güləş üzrə U-15 Avropa çempionatında qızıl medal qazanıb. Bu barədə ShimalNews 19 iyul tarixində məlumat verir.
Yarış Xorvatiyanın paytaxtı Zaqrebdə keçirilib. 14 yaşlı Səid Paşayev 85 kq çəkidə çıxış edib. O, finalda litvalı Rokas Miliauskasla görüşüb. Hesab 6:0 idmançımızın xeyrinə olduğu zaman o, görüşü tuşe ilə bitirərək fəxri kürsünün ilk pilləsinə yüksəlib.
Səid qızıl qazanmazdan öncə estoniyalı İlya Soboleva (11:0), gürcü Gigia Lukunidzeyə (10:0) və türkiyəli Hasan Dura (tuşe) qalib gəlib.
Güləşdə idmançılardan biri digərinin kürəyinin hər 2 nahiyəsini yerə sıxmağı bacararsa, bu zaman tuşe vəziyyəti yerinə yetirilmiş sayılır. Hesabın kimin xeyrinə olmasına baxmayaraq, kürəyi yerə sıxılmış idmançı avtomatik məğlub sayılır.
