Qusar şəhər 3 nömrəli tam orta məktəbdə “EKO-BREYN” – yaşıl yurdum festivalı adlı layihə çərçivəsində tədbir keçirilib.
Shimal.News xəbər verir ki, yarışda Hil, Həzrə kəndlərindən və Qusar şəhərindən olan 40 nəfər yeniyetmə və gənc 8 komanda tərkibində mübarizə aparıblar.
Tədbirin açılış mərasimində layihə rəhbəri, “Yurd” Gənclərin İntellektual İnkişafına Dəstək İctimai Birliyinin sədri Ramin Mahmudov çıxış edib. O bildirib ki, yarışın keçirilməsində əsas məqsəd ekoloji biliklərin, Azərbaycan coğrafiyasının, flora və faunasının gənc nəsil arasında təbliğ edilməsi, eyni zamanda gənclərin intellektual oyunlar vasitəsilə bilik və bacarıqlarının artırılmasının və asudə vaxtının səmərəli təşkil edilməsinin təmin olunmasıdır.
Turnir bir dövrəli dairəvi sistem üzrə keçirilib. Birinci yerə Hil kəndini təmsil edən “Qartal”, ikinci yerə Qusar şəhər 2 nömrəli tam orta məktəbinin “Gənclər”, üçüncü yerə Həzrə kənd tam orta məktəbinin eyniadlı komandası layiq görülüblər. Qaliblər kubok, medal, diplom və bədii ədəbiyyat nümunəli kitablarla təltif ediliblər.
