Qusar rayonunun Bədirqala kəndi ərazisində arxeoloqlar fundamental qazıntı işlərinə başlayıblar. Bu barədə ShimalNews 9 avqust tarixində Bizim.Media-ya istinadən məlumat verir.
Qusar-Xudat yolunun sağ hissəsindən 200 metr aralıda Qızılgül təpələri adlanan tarixi abidə yerləşir. Burada Azərbaycan Milli Elmlər Akademiyasının Arxeologiya, Etnoqrafiya və Antropologiya İnstitutu 1 ay ekspedisiya aparacaq. Şərti olaraq ərazini “Qızılgül təpələri-1” və “Qızılgül təpələri-2” adlandırıblar.
Ekspedisiya rəhbəri Qəhrəman Ağayev açıqlama verib. O bildirib ki, bu tarixi abidəni bir neçə il əvvəl qızılaxtaran şəxslər vəhşicəsinə dağıdıblar. Onlar abidənin mərkəzi hissəsini qazaraq bərbad hala salıblar.
Ötən əsrin 70-ci illərində Elmlər Akademiyasının əməkdaşları burada qazıntı işləri apararkən Qızılgül təpələrinin ilkin orta əsrlər dövrünə aid olması qənaətinə gəliblər.
Q.Ağayev deyir ki, 2021-ci ildə kəşfiyyat qazıntısı zamanı təsərrüfat quyuları, ocaq, təndir yerləri aşkar edilmişdi. Araşdırma və müşahidələr abidənin tarixinin lap qədim dövrlərə gedib çıxdığını deyir. Bu barədə qazıntı işlərinin sonunda ətraflı açıqlama veriləcək.
[caption id="attachment_45930" align="alignnone" width="640"]
Foto bizim media[/caption]
