Qusarda rayon ictimaiyyətinin polkovnik Rəşad Aslanovla görüşü təşkil edilib. Bu barədə ShimalNews 15 iyul tarixində Heydər Əliyev Mərkəzinin nümayəndəliyinə istinadən məlumat verir.
Hazırda Naxçıvan Əlahiddə Ümumqoşun Ordusunda Xüsusi Təyinatlı Qüvvələrin hərbi hissəsinin komandiri olan Rəşad Aslanov Qusarda anadan olub. O, "Qarabağ" ordeni, "Şuşanın azad olunmasına görə", "Xocavəndin azad olunmasına görə", "Füzulinin azad olunmasına görə", "Vətən müharibəsi iştirakçısı" medalları ilə Azərbaycan Respublikasının Prezidenti tərəfindən təltif olunmuşdur.
Tədbir çərçivəsində şəhidlər xiyabanı ziyarət olunub, sonra Aslanovun həyatı və fəaliyyəti ilə bağlı videotəqdimat nümayiş edilib. Daha sonra onun müəllimləri və sinif yoldaşları, rayon ictimaiyyətinin nümayəndələri öz səmimi arzularını söyləyiblər.
