Qusar Rayon İcra Hakimiyyətində kadr islahatları həyata keçirilib.
7times.az-ın məlumatına görə, icra başçısı Sahir Məmmədxanovun əmri ilə rayon icra hakimiyyətinin ərazi idarəetmə və yerli özünü idarəetmə orqanları ilə iş şöbəsinin müdiri Ənvər Balabəyov vəzifəsindən azad edilərək İmamqulukənd inzibati ərazi dairəsinə nümayəndə təyin edilib.
Bundan əlavə, icra hakimiyyətinin hüquq şöbəsinin müdiri Telman Kazımov vəzifəsindən azad edilərək Yasab kənd inzibati ərazi dairəsinə nümayəndə təyin olunub. Qeyd edək ki, T.Kazımovun oğlu Cavad Kazımov Qusar Rayon Polis Şöbəsinin Şahdağ Polis Bölməsinin rəisidir.
İşinə son verilən digər şəxslər isə Qusar Rayon İcra başçısının Qusar şəhər inzibati dairəsi üzrə nümayəndəsi Nahid Arazov və onun müavinidir.
Məlumata görə, icra başçısının digər müavini, ictimai-siyasi və humanitar məsələlər şöbəsinin müdiri Elman Mustafayev də yaxın günlərdə vəzifəsindən azad ediləcək. O, hazırda əmək məzuniyyətindədir.
Xatırladaq ki, bu ilin avqustunda icra başçısının sosial-iqtisadi inkişafın təhlili və proqnozlaşdırılması şöbəsinin müdiri Zoya Eldarova da öz ərizə ilə tutduğu vəzifədən getmişdi.
