Qusar Rayon Mərkəzi Xəstəxanasının baş direktoru Kamil Hacıyevdən xəstəxananın anbar bölməsinin müdiri Flora Mirzəağayeva şikayətçi olub.
Shimal.News-un əldə etdiyi məlumata görə, buna səbəb Kamil Hacıyevin onu qanunsuz olaraq işdən çıxarması olub.
Belə ki, Flora Mirzəağayeva 2013-cü il sentyabr ayının 1-də xəstəxana ilə müddətsiz müqavilə bağlayıb. Xəstəxananın baş direktoru Kamil Hacıyev isə Flora Mirzəağayevanı 2024-cü il iyul ayının 22-də əmək müqaviləsinin müddətinin bitməsinə görə işdən azad edib.
Onu qanunsuz işdən azad etməsinə görə, Flora Mirzəağayeva Dövlət Əmək Müfəttişliyinin Quba-Xaçmaz regional şöbəsinə müraciət edərək işdən qanunsuz azad edildiyini bildirib. Müraciətə əsasən Kamil Hacıyevin əmri qanunsuz hesab edilib və ona tənbeh tətbiq olunub.
Bununla da, ona qarşı tənbehin tətbiq olunmasından narazı qalan baş həkim Kamil Hacıyev məhkəməyə müraciət edib. Məhkəmə iclasında hakimlər baş direktorun iddiasını təmin etməyib. Nəticədə Əmək Müfəttişliyi Xidmətinin qərarı qüvvədə saxlanılıb. Belə ki, Əmək Müfəttişliyi Xidməti Kamil Hacıyevi 1800 manat məbləğində cərimə edib.
"Qusar Rayon Mərkəzi Xəstəxanası" publik hüquqi şəxsinə yazılan inzibati protokola Qusar Rayon Məhkəməsinin hakimi Əli Cəlilovun sədrliyi ilə noyabrın 15-i saat 11:00-da baxılacaq.
Kamil Hacıyevə İnzibati Xətalar Məcəlləsinin 192.1-ci maddəsinə əsasən tərtib edilib.
Fidan İlqar
