Qusar rayon Mərkəzi Xəstəxanasının keçmiş baş həkimi və direktoru verilən hökmdən apellyasiya şikayəti verib. Bu barədə ShimalNews 2 fevral tarixində Teleqraf.com-a istinadla xəbər verir.
7 il müddətinə azadlıqdan məhrum edilən Mübariz Zeynalovun Sumqayıt Apellyasiya Məhkəməsində şikayəti üzrə məhkəmə iclası baş tutub. Hakim Ruhiyyə Əsgərovanın sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Növbəti iclas fevralın 15-nə təyin edilib.
Mübariz Zeynalov COVİD-li xəstələrlə işləyən tibb işçilərinin aylıq vəzifə maaşının 3 misli miqdarında əlavə nəzərdə tutulsa da, baş həkim cədvəldə bu rəqəmi 5 misli göstərib. Arada olan fərqi isə özü mənimsəyib. Bundan əlavə, 13 nəfərin maaş kartına köçən 12 min 800 manatdan artıq vəsait baş həkimə çatıb.
Xəstəxanada ödənişli tibbi xidmətlərin göstərilməsi nəticəsində 3444 ədəd qəbzlə kassada toplanmış ümumilikdə 53 min 800 manatı Mübariz Zeynalov götürüb. Bu vəsaitin cəmi 70 manatını xəstəxananın bank hesabına köçürüb. Bundan əlavə, sabiq baş həkim xəstəxananın həkim-stomatoloqundan yararsız hala düşmüş 5 çıxışlı stomatoloji kreslonun əvəzinə yenisini almaqdan ötrü 2 min manat rüşvət alıb.
Mübariz Zeynalovun adı bir neçə il öncə başqa bir cinayət işində zərərçəkmiş kimi hallanıb. İddia olunurdu ki, həkimi şəxsi həyatına aid görüntü və məlumatları yaymaqla hədələyib, ondan pul alıblar. Təqsirləndirilən şəxslər isə bildirirdilər ki, Zeynalov 130 min manatı Qusardan Sumqayıt Mərkəzi Xəstəxanasına baş həkim gəlmək üçün verib.
