Qusar Olimpiya İdman Kompleksinin rəhbərliyi, məşqçi-müəllimləri və Quba-Xaçmaz Regional Gənclər və İdman İdarəsinin rəisi Nəcəf Novruzov məktəblilərlə görüşə gəliblər. Bu haqda ShimalNews 28 noyabr tarixində kompleksə istinadən məlumat verir.
4 saylı tam orta məktəbdə təşkil edilən tədbirdə 150-dək şagird iştirak edib. Qonaqlar çıxışlarında gənclərin idmana cəlb olunmaları əhəmiyyətindən danışıblar. Daha sonra kompleksin tanıtım videosu nümayiş etdirilib.
İdman kompleksinin məşqçi-müəllimləri Vahid Quliyev (badminton), Elşən Şükürov (boks, kikboksinq, MMA), Loğman Aslanov (karate) və Elmar Niftəliyev (ciu-citsu) məktəbliləri idmanla məşğul olmağa səsləyən təqdimatla çıxış ediblər.
Sonda fəal şagirdlərdən bir qrupuna hədiyyələr, məktəbin direktoru E.Bayramovaya isə kompleksin kollektivinin imzaladığı top hədiyyə olunub.
