Aktiv istirahət sevənlər bu dəfə Qubanın Susay meşəsinə üz tutublar. Bu barədə ShimalNews 15 iyul tarixində Qafqaz TV-yə istinadən məlumat verir.
“Çölçü” İB bir qrup gənc üçün təlimat keçib. Daha sonra Gəray kəndindən Susay kəndinə qədər insan ayağı dəyməyən, uzanan sıx ağacların arası ilə yürüşə başlanılıb. Burada çölçülər sözün əsl mənasında dərələrdən keçiblər, təpələri aşıblar, yollarını kəsən çayı atlayıblar.
“Yurdu tanımasan, görməsən, dağını, meşəsini, şəlaləsini, bulağını tanımasan, onu dərindən sevə bilmirsən. Çünki insan öz gözü ilə görmədiklərinə dəyər verə bilmir. Amma o gözəllikləri gedib gördükdə, yaxından hiss etdikdə, o bulaqdan su içdikdə, o şəlalənin səsini eşitdikdə, onu dərindən mənimsəyir. Yurdun hər qarışı, hər addımı sənə əziz olur, doğma olur. Orada xatirələrin olur. O zaman yurdu yuvan kimi görə bilirsən”, - “Çölçü” İB-nin rəhbəri rejissor Eltən Törəçi deyib.
“Çölçü” ictimai birliyi – qədim türk adətləri və gələnəklərinin üzərində modernizə edilmiş, insanların təbiətdən kənarlaşmasına alternativ olaraq, təbiətlə vəhdəti və harmoniyanı irəli sürən çölçülük submədəniyyəti daşıyıcılarını birləşdirir. Onun əsası 2015-ci ildə rejissor, yazar Eltən Qədimbəyli (Törəçi) tərəfindən qoyulub.
