Dövlət Sərhəd Xidmətinin Sərhəd Qoşunlarının kiçik giziri şəhid Fərid Alimovun qızı İlahə Alimovanın səhhəti ağırlaşıb. Bu haqda ShimalNews 17 aprel tarixində məlumat verir.
Uşaq əvvəlcə Quba Müalicə Diaqnostika Mərkəzinin Reanimasiya şöbəsinə yerləşdirilmişdi. Onun vəziyyəti ağır qiymətləndirilib və dünən axşam saatlarında paytaxtda yerləşən Milli Hematologiya və Transfuziologiya mərkəzinə köçürülüb.
Şəhid gizir Fərid Alimov 2021-ci il mayın 15-i aldığı güllə yarasından vəfat edib. Hadisə Yardımlı rayonunun Gendərə kəndi yaxınlığında Dövlət Sərhəd Xidmətinin Sərhəd Qoşunlarının xidməti ərazisində baş verib. Naməlum 3 nəfər dövlət sərhədini pozmaq istəyib. Onların açdıqları atəş nəticəsində Alimov yaralanıb. Hərbi qulluqçu dərhal tibb müəssisəsinə təxliyə olunub, lakin həyatını xilas etmək mümkün olmayıb.
Mayın 16-sı isə şəhidin nəşi doğulduğu kəndə gətirilib və kənd qəbiristanlığında dəfn olunub.
