Quba rayon sakini B.Cavadova (şərti) keçmiş iş yoldaşını yuxuda tez-tez gördüyündən narahat olub və İnstaqram sosial şəbəkəsində falçıya müraciət edib. Bu barədə ShimalNews 25 iyun tarixində “Qafqazinfo”ya istinadən məlumat verir.
Qadın “falci baxici Emma” adlı səhifəyə müraciət edib və bir qədər sonra şantaja məruz qalıb. Təhdidlərdən və pul tələb edilməsindən bezərək B.Cavadova Quba Rayon Polis Şöbəsinə müraciət edib. Araşdırma aparılıb və cinayəti törədənin 22 yaşlı Bakı şəhər sakini R.Əliyev olduğu müəyyən olunub. Həmin şəxs saxlanılıb.
Məhkəmədə B.Cavadova hadisə barədə ətraflı məlumat verib:
“Quba şəhərində yerləşən marketlərdən birində satıcı işləyirdim. İşdən çıxdıqdan sonra iş yoldaşım A.Ramazanovu mütəmadi olaraq yuxuda görürdüm. Bundan narahat olaraq, falçıya müraciət etdim. 10 yanvar 2024-cü il tarixində instaqramda “falci_baxici_emma” adlı səhifə ilə yazışaraq əlaqə saxladım, əvvəllər bir yerdə işlədiyim oğlanı tez-tez yuxuda gördüyümdən narahat olduğumu bildirdim.
Yazışdığım şəxs fala baxmaq üçün özümün və oğlanın şəkillərini istədi. Öz şəklimi və oğlanın fotosunu sosial şəbəkədən skrin edib yolladım. Şəkilləri göndərdikdən sonra yazışdığım şəxs mənə bəxtimin bağlı olduğunu bildirərək təmizlənməsi üçün 200 manat pul istədi”.
Bu pulla kifayətlənməyən R.Əliyev sonra da B.Cavadovanı şantaj edərək pul tələb etməyə başlayıb. O, yalandan özünü haker kimi təqdim edib və falçının səhifəsini ələ keçirdiyini deyib. Qubada yaşayan həmin oğlana yazaraq, baş verənləri ona deyəcəyi, rüsvay edəcəyi ilə hədələyərək qadından ümumilikdə 430 manat alıb.
