Bu gün Qubadan olan şəhidlər Rəşad Quliyevin və Rəfail Şeydayevin xatirələri yad edilir. Bu haqda ShimalNews 7 oktyabr tarixində məlumat verir.
Əslən Qubadan olan Rəşad Quliyev 23 sentyabr 1983-ü ildə anadan olub. Aprel döyüşlərində iştirak edən polkovnik-leytenant 2020-ci il sentyabrın 27-də başlanan Vətən müharibəsində də igidcəsinə savaşıb. O, öz şücaətinə görə döyüş yoldaşları tərəfindən “Canavar” ləqəbini qazanıb. Quliyev oktyabrın 7-də Cəbrayılın azad edilməsi zamanı şəhidlik zirvəsinə ucalıb. O, II Şəhidlər xiyabanında dəfn olunub.
Rəşad Quliyev "Qüsursuz xidmətə görə" 2-ci dərəcəli medalla, ölümündən sonra isə “Vətən uğrunda”, “Cəbrayılın azad olunmasına görə”, “Füzulinin azad olunmasına görə” və “Qubadlının azad olunmasına görə” medalları və “Azərbaycan Bayrağı” ordeni ilə təltif olunub.
Rəfail Şeydayev 1 avqust 2000-ci ildə Quba rayonunda anadan olub. O, Azərbaycanın ərazi bütövlüyü uğrunda başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Silahlı Qüvvələrin əsgəri oktyabrın 7-də şəhid olub.
Şeydayev ölümündən sonra “Vətən uğrunda”, “Füzulinin azad olunmasına görə”, “Şuşanın azad olunmasına görə” və “Cəsur döyüşçü” medalları ilə təltif olunub.
Allah bütün şəhidlərimizə rəhmət etsin!
