Quba rayonunun Xınalıq kəndində evlərin təmir-bərpa işləri davam edir. Bu haqda ShimalNews 26 sentyabr tarixində Report-a istinadən məlumat verir.
Dövlət Turizm Agentliyinin Qoruqları İdarəetmə Mərkəzinin tikinti sektorunun müdiri Elşən Ağalarov bildirib ki, cari ildə Xınalıq kəndində 20 evin bərpası həyata keçirilir.
"Hava şəraiti imkan versə, bu evlərin hamısının təmir-bərpası sona çatdırılacaq. Əks-təqdirdə 17 ev təhvil veriləcək. Ümumilikdə Xınalıqda 4 il müddətində - 2021-2024-cü illərdə 60 evin təmir-bərpası layihələndirilib. 2021-ci ildə 16, 2022-ci ildə 11 ev sakinlərinə təhvil verilib. 2024-cü ildə isə qalan evləri təmir-bərpa etməyi planlaşdırırıq", - Ağalarov qeyd edib.
