Quba rayonu 1-ci Nügədi kənd 1 nömrəli tam orta məktəbində “Nə? Harada? Nə zaman?” intellektual oyun formatında turnir keçirilib. Bu barədə ShimalNews 18 iyun tarixində məlumat verir.
Yarışda 1-ci Nügədi, 2-ci Nügədi, Çiçi, Amsar, Səbətlər, Pirvahid, Rustov, Püstəqasım, Qamqam, Məckəxacə kəndlərindən olan 65 nəfər yeniyetmə və gənc 13 komanda tərkibində mübarizə aparıb.
Qalib adına Amsar komandası layiq görülüb. Püstəqasım kəndinin “Xarıbülbül” və Qamqam kəndinin “Xəmsə” komandaları isə yarışda müvafiq olaraq, 2-ci və 3-cü yerləri tutub. Qalib və mükafatçılara kubok, medal, diplom və bədii ədəbiyyat nümunəli kitablar təqdim olunub.
Yarış Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Yurd” Gənclərin İntellektual İnkişafına Dəstək İctimai Birliyi tərəfindən icra olunub. Məqsəd mədəni irsin yeniyetmə və gənclər arasında təbliğidir.
