“Samur” gömrük postunda dərman vasitələrinin qaçaqmalçılıq yolu ilə ölkə ərazisinə gətirilməsi cəhdinin qarşısı alınıb. Bu haqda ShimalNews 8 aprel tarixində Dövlət Gömrük Komitəsinin səhifəsinə istinadən məlumat verir.
Rusiya Federasiyası istiqamətindən hərəkət edərək Azərbaycan ərazisindən tranzit qaydada keçməklə Türkiyəyə gedən yük maşını gömrük yoxlaması üçün saxlanılıb. Nəqliyyat vasitəsinin yük yerindən mal müşayiət sənədlərində göstərilməyən, gömrük orqanına şifahi, kağız üzərində yazılı və ya elektron formada bəyan edilməyən 9990 qutuda, 325 paketdə, 42 plastik qabda, 761 flakonda qablaşdırılan 27 müxtəlif adda dərman vasitələri aşkar edilib.
Bundan əlavə, üzərində heç bir yazı qeyd olunmayan 637 flakon maye, üzərində “Neofin” yazısı olan 400 qutu və hər hansı yazı olmayan 350 ədəd karton kağız, 320 ədəd üzərində yazı olmayan şəffaf plastik qablar, üzərlərində “Neofin/ Neofin”, “Neofin Aqua”, ‘www.neofın.bio vertification” yazıları olan 16 rulon stiker tapılıb.
