Ötən günlərdə Qusarın Laza kəndində Vətən müharibəsi qazisi Elmar Ağakişiyevin toyundan görüntülər yayımlanıb. Baş tutan toy məclisində kəndin özünəməxsus adətləri xüsusilə diqqət çəkib.
Shimal.News-ın əməkdaşı həmin görüntülərin qəhrəmanı Elmar Ağakişiyev ilə həmsöhbət olub.
Müsahibəni təqdim edirik:
- Elmar bəy, öncə özünüz haqqında məlumat verməyinizi istərdim.
- Mən Elmar İlqar oğlu Ağakişiyev 2000-ci il yanvar ayının 1-də Qusar rayonunun Laza kəndində dünyaya göz açmışam. Kənd məktəbində təhsil almışam. Təəssüf ki, təhsilimi davam etdirə bilməmişəm. Anadan olandan bu günə qədər də Lazada yaşayıram.
- Döyüş yolunuzdan danışardınız. Vətən müharibəsində döyüşlərə nə zaman qatıldınız ?
- Vətən müharibəsi başlayan ilk gündən döyüşlərdə iştirak etmişəm. Füzuli, Cəbrayıl, Xocavənd, Hadrut, Laçın və Şuşanın azad olunmasında iştirak etmişəm.
Müharibənin, döyüşün öz çətinlikləri olur. Bir dəfə mühasirəyə düşdük və 3 gün boyunca ac-susuz qaldıq. Lakin buna baxmayaraq, düşməni darmadağın etdik. 30 nəfərlik heyət ilə onların 500-600 nəfərlik briqadasını məhv etmişik. Amma bu savaşda döyüş yoldaşlarımızdan şəhid olanlar da oldu.
Biz döyüşə-döyüşə Laçına girdik. Amma 24 oktyabr tarixində Laçın dəhlizində yaralandığım üçün şəhərə girə bilmədim. Onlar bizə üç raket atdılar. Sonuncunu vuranda komandirə dedim ki, “təpənin arxasına keçək”. Dedi ki, “təpənin arxasına keçsək, hücum edəcəklər”. Ön tərəfdə idim. Raket atıldı. Dalğası məni yerə çırpdı. Uşaqlar özünə gələndən sonra görüblər ki, mən yoxam. Məni axtarmağa başlayıblar. Daha sonra çəkməmi görüb, zənn ediblər ki, tikə-tikə olmuşam. Dalğanın təsirindən mən torpağın altındaydım. Torpağı qazıb məni çıxarıblar. Üç gün komada oldum, on gün danışa bilmədim. Ağır kəllə beyin travması keçirdim.
- Sosial şəbəkələrdə toyunuz ilə bağlı maraqlı görüntülərə rast gəldik. Xoş gününüzün Vətən müharibəsi günlərində baş tutması təsadüfdürmü?
- Bəli, təsadüfdür. Biz daha tez toy etmək istəyirdik. Qız evi işini gec bitirdiyi üçün Vətən müharibəsi günlərinə təsadüf etdi. Toyumuz da oktyabrın 6-da baş tutub. Sadəcə görüntüləri gec yayıldı. Nikahımız da oktyabrın 24 oldu. 2020-ci ilin həmin günü mən yaralanmışdım.
- Hazırda nə işlə məğulsunuz? Qusarın Laza kəndində sakinlər hansı işlərlə məşğuldur?
- Yay mövsümündə ailəvi istirahət mərkəzində inzibatçı olaraq fəaliyyət göstərirəm. Daimi bir işim yoxdur. Soyuq olan yerlərdə qala, işləyə bilmirəm. Ancaq isti yerlərdə işləyə bilirəm. Qar yağanda yəqin ki, istirahət mərkəzindəki işimi sonlandıracam. Çünki soyuq olan kimi ağrılarım başlayır.
Lazada insanlar müxtəlif işlərlə məşğul olurlar. Mal-qara saxlayan da, öz işini quran da var. Kəndimizin qaz problemi var.
- Yoldaşınız Selcan xanımla necə tanış olmusunuz?
- Onunla 2023-cü ildə tanış olmuşam. Onlar klinikaya gəlmişdilər. Kəndlərinə qədər arxasıyca getdim. Onunla tanış olmaq üçün çox çətinliklər çəkmişəm. Şükür ki, qovuşduq.
- Döyüş yoldaşlarınız toyunuzda iştirak etdilər?
- Döyüş yoldaşlarım təbii ki, toy günümdə məni təbrik üçün gəlmişdilər. Döyüş yolu keçən insanların dostluğu başqa cür olur. Bir-birimizlə əlaqə saxlayırıq, imkan olanda görüşürük, məclislərdən geri qalmırıq.
- Toyunuzun Vətən müharibəsi günlərinə təsadüf etməsini necə qarşıladılar?
- Qınayanlar olmadı. Hər kəs sevinirdi. Mən nələrdən keçmişəmsə, bilənlər bilir. Hər kəs xoş günümə sevinirdi.
Nəzrin Vahid
