İsmayıllının Yuxarı Zərnava kəndini avtomobil yolu ilə çayın üstündən keçən körpü birləşdirir. Bu barədə ShimalNews 1 iyun tarixində İctimai TV-yə istinadən məlumat verir.
Girdiman çayının üzərindən asılan bu körpünün uzunluğu 74 metrdir. O, həm də adrenalin sevənlərin diqqətini cəlb edir. Lahıca gələn qonaqların əksəriyyəti bura baş çəkir.
Əvvəllər buradan keçid ödənişsiz olsa da, indi yerli qonaqlardan 2 manat, əcnəbi vətəndaşlardan 4 manat pul yığılır.
Bu məqamda fikir ayrılığı yaranır. Bəziləri ödənişin olmasından narazıdır, bəziləri isə bunu məqbul sayır.
Maddi vəsaitin nə üçün yığılmasına gəldikdə Zərnava bələdiyyə nümayəndəsinin cavabı belə olub:
“Əvvəllər nəzarətsiz olan həmin körpü 2015-ci ilə qədər tamamilə dağılıb sıradan çıxmışdı. Yerli bələdiyyə tərəfindən həmin körpü balansa götürülmüş və əsaslı təmir olunmuşdur. Turistlərə xidmət göstərir, torpaq haqqında məlumat verilir, növbələşdirilir, həmin göstərilən xidmətlərin haqqı kimin nə imkanı çatırsa, bəlkə də, 50 qəpik verən də olur, yerli sakinlərə, ümumiyyətlə, ödənişsizdir. Həmin vəsait MMC-nin büdcəsinə daxil olur, həmin şəxslərə əmək haqqı çıxarılır. Elə bu 2 nəfərin əmək haqqını və əlbəttə ki, vergiləri ödəməyə vəsait bəs eləyir”, - deyə Haqverdi Məhərrəmov bildirib.
Nümayəndənin sözlərinə görə, mövsümə, turistlərin sayına və hava şəraitinə görə yığılan məbləğ ildən-ilə dəyişir. Yığılan pulun hesabına yolların və ictimai binaların abadlaşdırılması, qəbiristanlıqlarda səliqə-sahmanın yaradılması təmin edilir.
