İsmayıllının dörd kəndinin şagirdləri 10 gündür dərsə getmirlər.
"Xəzər Xəbər"in məlumatına görə, məktəblilər keçən il qonşu kənddəki məktəbə nəqliyyat vasitələri ilə aparılsalar da, bu il daşınma dayandırılıb. Nəticədə Yeniyol, Tircan-Ferma, Zərgəran, Pirəbilqasım kəndlərində yaşayan 52 şagird təhsil ala bilmir.
Dağlıq Şirvan Regional Təhsil İdarəsindən məsləyə münasibət bildirilib:
"İsmayıllı rayonunun dörd kəndində say azlığı səbəbindən şagirdlər rayonun Təzəkənd kənd tam orta məktəbinə köçürülüblər. 52 məktəblinin ötən tədris ilində ayrılmış nəqliyyat vasitəsi ilə daşınması təmin edilib. Bu proses yeni tədris ilində oktyabrın birinə kimi davam edib və daşıyıcı şirkətlə müqaviləyə xitam verilib. Hazırda şagirdlərin daşınmasını həyata keçirmək üçün başqa şirkətlərlə aparılan danışıqlar davam etdirilir. Proses yaxın günlərdə bərpa ediləcək".
