İsmayıllıda sintetik torla balıq ovlanmasının görüntüləri sosial şəbəkədə yayılıb.
Shimal.News məlumat verir ki, bu halın Aşıqbayram gölündə qeydə alındığı iddia olunur. Məsələ ilə bağlı Dövlət Ekoloji Təhlükəsizlik Xidmətinin rəsmisi Bəhruz Məhəmmədov açıqlama verib:
“Sözügedən ərazidə Xidmətin regional qurumunun və İsmayıllı Rayon Polis Şöbəsinin əməkdaşları tərəfindən reyd və monitorinqlər keçirilib və su anbarının ərazisində qanunsuz balıq ovlanması faktı qeydə alınmayıb. Ərazi nəzarətə götürülüb”.
Xidmət rəsmisi onu da bildirib ki, araşdırma zamanı sözügedən görüntülərin əvvəlki dövrə aid olduğu müəyyən edilib.
Su hövzələrində balıqların istifadəsi qadağan olunmuş sintetik torlarla ovlanması cinayətdir. Qanunvericiliyə əsasən sənaye balıq ovu ilə məşğul olan subyektlərin kapron və kətan liflərdən hazırlanmış torlar istisna olmaqla, digər sintetik saplı və tək saplı torlarla balıq ovu ilə məşğul olması qadağandır. Bunu Dövlət Ekoloji Təhlükəsizlik Xidmətinin rəisi Hikmət Əlizadə bildirib.
