İsmayıllı rayonundan "Lahıc" Xalq Folklor Kollektivi “Tərəkəmə Çərşənbəsi” V Beynəlxalq Folklor Festivalında iştirak edib. Bu haqda ShimalNews 3 iyun tarixində məlumat verir.
Tədbir Mədəniyyət Nazirliyinin dəstəyi, "Miras" mədəni irsin öyrənilməsinə kömək İctimai Birliyinin təşkilatçılığı ilə keçirilib.
Ağsu rayonunun Gəgəli kəndində 1-2 iyun tarixlərində keçirilmiş festivalda Azərbaycandan olan folklor kollektivləri ilə bərabər, Türkiyə, İtaliya, Gürcüstan və digər dövlətlərdən dəvət olunmuş xalq ansamblları, folklor və xor kollektivləri də iştirak edib.
Burada rəsm əsərləri, dekorativ-sənətkarlıq nümunələri, kənd məhsullarından ibarət sərgi-yarmarka təşkil edilib. Tanınmış rəssamlar, heykəltaraşlar, el sənətkarları, idman ustalarının ustad dərsləri keçirilib. Eyni zamanda kəndirbazlar, zorxana, oxatma, çilingağac kimi milli oyunlar da nümayiş olunub.
Festivalın keçirilməsi tərəkəmə həyat tərzinin və köç yollarının UNESCO siyahısına alınması ilə səsləşir.
