İsmayıllıdan Bakıya göndərilən 2 ton at əti ünvana çatmayıb. Bu barədə ShimalNews 31 may tarixində Daxili İşlər Nazirliyinə istinadən xəbər verir.
İsmayıllı RPŞ-nin əməkdaşları daxil olmuş əməliyyat məlumatı əsasında tədbir keçiriblər. Xəyal Ziliyevin idarə etdiyi “Ford” markalı avtomobil saxlanılıb. Nəqliyyat vasitəsinin yük yerinə baxış keçirilən zaman oradan mənşəyi məlum olmayan at əti tapılıb.
Araşdırma zamanı ətin Cülyan kənd sakini Samir İsayevə məxsus olduğu və X.Ziliyevin istifadəsində olan avtomobillə Bakı şəhərinə göndərmək istədiyi müəyyən edilib.
Davam etdirilən tədbirlərlə S.İsayev də şöbəyə gətirilərək izahatı alınıb. Aşkar edilmiş 10 rəst ata aid ət müvafiq nümunələr götürülməsi üçün Qida Təhlükəsizliyi Agentliyinin əməkdaşlarına təhvil verilib.
Faktla bağlı araşdırmalar davam etdirilir.
