İsmayıllı sakinini öldürüb meyitini yandırmaqda təqsirləndirilən Elvin Əliyev və Ümidvar İbişovun barəsindəki qərardan kassasiya şikayəti verilib.
Pravda.az-ın məlumatına görə, şikayət Ali Məhkəmənin hakimi Hafiz Nəsibovun sədrliyi ilə araşdırılacaq. Məhkəmənin ilkin hazırlıq iclasının vaxtı açıqlanmayıb.
Həbs olunan şəxslər 2020-ci ilin mart ayında 1978-ci il təvəllüdlü Rəşad Məmmədovu öldürmək barədə qabaqcadan razılığa gəliblər. E.Əliyev Rəşadı narkotik asılılıqdan müalicə almaq üçün tibb müəssisəsinə yerləşdirmək adı ilə Bakı şəhərinin Qaradağ rayonu ərazisindən Yasamal rayonu istiqamətində aparıb. O, mərhumu “Hyundai” markalı avtomobilə əyləşdirib hərəkətdə olarkən kəmərlə boğub.Əməlinin izini gizlətmək üçün meyitini İsmayıllı rayonunun Tubu kəndinə gətirib və Ümidvar İbişovla birgə onu yandırıblar.
Bakı Ağır Cinayətlər Məhkəməsində keçirilən prosesdə Ümidvar İbişov 17 il 6 ay, Elvin Əliyev isə 17 il 9 ay 15 gün müddətinə azadlıqdan məhrum ediliblər.
