Azərbaycanın ali təhsil müəssisələrində 2023-2024-cü tədris ilində bakalavriat və magistratura səviyyələrində xarici ölkələrin 6680 vətəndaşı təhsil alıb.
Redaktor.az-ın məlumatına görə, tələbələrin 891-i MDB ölkələrinin, 5789-u isə digər ölkələrin payına düşür. Əcnəbi tələbələrin sırasında Türkiyə, Suriya, Pakistan, İran, İraq, Hindistan, Gürcüstan, Qazaxıstan, Rusiya və Çin vətəndaşları var.
Ötən tədris ilində ali təhsil müəssisələrində 6223, 2005/2006-cı tədris ilində isə 3073 əcnəbi tələbə təhsil alıb.
2023-2024-cü tədris ilinin əvvəlinə olan məlumatına görə, xarici ölkələrdə dövlət xətti ilə təhsil alan Azərbaycan vətəndaşlarının sayı 997 nəfər olub. Onların 217-si MDB-yə üzv olan ölkələrdə, 780-i isə digər ölkələrdə təhsil alır.
