Ötən gün Siyəzən şəhərində 14 yaşlı məktəbli dəm qazından boğularaq dünyasını dəyişib. Bu, ailədə baş verən ikinci faciədir. 11 il öncə ailənin 2 oğlu da Samur-Abşeron kanalında boğularaq ölüblər. 4 övladı olan ailənin indi 1 azyaşlı oğlan övladı qalıb.
Dəm qazından dünyasını dəyişən məktəblinin dayısı Teymur Mustafayev baş verənləri Shimal.News-la bölüşüb:
- Yuyunmaq üçün hamam otağına keçib. 3 dəfə xəbərdarlıq eləyiblər ki, necəsən, vəziyyətin necədir? İki-üç dəfə cavab verib. Sonradan görüblər ki, səs gəlmir. Qapını açanda görüblər ki, yerdə uzanıb. Tez təcili yardım çağırılıb. Məlum olub ki, iş-işdən keçib. Dedilər dünyasını dəyişib. 14 -15 yaşın içində idi. Tək övlad olmayıb. 11 il bundan əvvəl iki qardaşı da dünyasını dəyişib. Kanalda batdılar. Bu da üçüncü. İki oğul, bir qız. İndi bir balaca övlad qalıb, oğlan uşağıdır. 2-ci sinifdə oxuyur.
