Baş prokuror Kamran Əliyev Zaqatala rayon prokurorluğunun inzibati binasında Zaqatala, Şəki, Qax, Balakən və ətraf bölgələrdən olan vətəndaşları qəbul edib.
Shimal.News xəbər verir ki, qəbul zamanı 57 vətəndaşın müraciətləri dinlənilib.
Vətəndaşlar tərəfindən konkret cinayət işlərinin istintaqı, törədilmiş cinayətlərin araşdırılması zamanı yol verilən qanun pozuntuları və məhkəmədə baxılan işlər üzrə dövlət ittihamının müdafiəsi ilə bağlı məsələlər qaldırılıb. Müraciətlərin operativ araşdırılması və müvafiq tədbirlərin görülməsi üçün aidiyyəti strukturlara tapşırıqlar verilib.
Qəbuldan sonra Kamran Əliyev prokurorluq əməkdaşları ilə görüş keçirərək onlara konkret tapşırıqlar verib. O, vətəndaş müraciətlərinə obyektiv yanaşmanın vacibliyini vurğulayıb və qəbulların səmərəli təşkilinə görə yerli prokurorların fərdi məsuliyyət daşıdıqlarını diqqətə çatdırıb.
