Şəkidə həmkəndlisini bıçaqlayan şəxs barəsində qərar verilib.
Pravda.az-ın məlumatına görə, Şəki Apellyasiya Məhkəməsində xuliqanlıqda təqsirləndirilən Habil İslamovun (adı, soyadı şərtidir) barəsindəki qərardan verilən apellyasiya şikayəti üzrə məhkəmə iclası yekunlaşıb.
Qərara əsasən, apellyasiya şikayəti təmin edilməyib.
İttihama görə, hadisə 16 aprel 2024-cü il tarixdə, saat 15 radələrində Şəki rayonunun Kiçik Dəhnə kəndi ərazisində yerləşən "Dəhnə" şadlıq sarayında qeydə alınıb.
Belə ki, sözügedən şadlıq sarayında keçirilən toy şənliyində sərxoş vəziyyətdə olan Habil İslamov onunla bir masada yanaşı əyləşmiş həmkəndlisi, zərərçəkmiş Əkrəm Taharovla (adı, soyadı şərtidir) mübahisə edib.
Mübahisə zamanı Habil onun ünvanına ucadan nalayiq ifadələr işlədib, sonra üzərində olan bıçaqla qəsdən Əkrəmin sol ayağının bud nahiyəsinə zərbələr vuraraq, xəsarətlər yetirib.
Hadisədən sonra Habil İslamov saxlanılaraq cinayət məsuliyyətinə cəlb edilib.
Şəki Rayon Məhkəməsinin hökmü ilə o, 2 il müddətinə azadlıqdan məhrum edilib və məhkəmə iclas zalında dərhal həbsə alınıb.
