Xaçmaz rayonunun Şıxlar kəndində qəhvəyi mərmər bağacığının kütləvi yayılması sakinlərin narahatlığına səbəb olub. Həşəratlar evlərin divarlarına, qapılarına və həyətlərə dolur. Ərazini dəfələrlə təmizləmələrinə baxmayaraq, sakinlər problemin qarşısını ala bilmirlər.
Shimal.News-a müraciət edən kənd sakinlərinin sözlərinə görə, həşəratların sayı o qədər artıb ki, həyəti təmizləmək də vəziyyətdən çıxış yolu olmur. Onlar ərazini artıq üç dəfə təmizlədiklərini, lakin bağacıqların yenidən yayıldığını bildirirlər. Hazırda sakinlər dördüncü dəfə təmizlik aparmaq məcburiyyətində qalıblar.
Sakinlərin sözlərinə görə, qəhvəyi mərmər bağacıqları sanki yağış kimi həyətə tökülür. Bu vəziyyət onların gündəlik həyatına da çətinlik yaradır.
Qeyd edək ki, qəhvəyi mərmər bağacığı kənd təsərrüfatı bitkilərinə zərər verən invaziv həşərat növüdür. Sakinlər problemin aradan qaldırılması üçün müvafiq qurumların tədbir görməsini istəyirlər.
Xatırladaq ki, Xaçmaz rayonunun Xanoba kəndindən də qəhvəyi mərmər bağacığının yayılması ilə bağlı oxşar şikayət daxil olub.
