Bu gün saat 09:45-də Xaçmaz-Qusarçay sahəsində minik avtomobili dəmiryol keçidindən keçid qaydalarını pozaraq hərəkətdə olan teplovozun qarşısına çıxıb.
"Azərbaycan Dəmir Yolları" QSC-nin mətbuat xidmətindən bildirilib ki, maşinist tərəfindən təcili tormozlama aparılsa da, məsafə az olduğundan toqquşma qaçılmaz olub. Minik avtomobilinin sürücüsü xəstəxanaya aparılıb.
Hadisə nəticəsində dəmiryol infrastrukturuna zərər dəyib. Faktla bağlı araşdırma aparılır.
"ADY nəqliyyat vasitələri sürücülərini "Yol hərəkəti haqqında" qanunun 44-cü maddəsinin tələblərinə ciddi riayət etməyə, dəmir yolu keçidlərinə yaxınlaşarkən sürət həddini aşağı salmağa, yüksək sayıqlıq göstərməyə və keçidin qatardan boş olduğuna tam əmin olduqdan sonra hərəkətlərini davam etdirməyə çağırır.
***
Xaçmaz rayonunda ölümlə nəticələnən yol-nəqliyyat hadisəsi baş verib.
Shimal.News xəbər verir ki, hadisə rayonun Nərəcan kəndi ərazisində qeydə alınıb.
Dəmiryol keçidindən keçmək istəyən "VAZ-21011" markalı avtomobil qatar ilə toqquşub.
Nəticədə avtomobilin sürücüsü – rayonunun Ağtala kənd sakini, 22 yaşlı Çələbiyev Səid İlham oğlu ağır xəsarətlər alaraq hadisə yerində həyatını itirib.
Faktla bağlı xətt polisi tərəfindən araşdırma aparılır.
Qeyd edək ki, Xaçmaz rayonunda sözügedən dəmiryolu keçidində bundan əvvəl də faciəvi hadisələr baş verib. Shimal.News-un məlumatına görə, üç həftə əvvəl qatar piyadanı vurub, 2019-cu ildə isə qatar qadını vuraraq öldürüb. Keçiddə şlaqbaum və ya digər təhlükəsizlik vasitələri hələ də mövcud deyil.
