Ali Məhkəmədə qəsdən sağlamlığa yüngül zərər vurmaqda təqsirləndirilən Tutu Kərimova (adı, soyadı şərtidir) barəsindəki qərardan verilmiş kassasiya şikayətinə baxılıb.
Pravda.az-ın məlumatına görə, hakim İlqar Qılıcovun sədrliyi ilə keçirilən iclasda kassasiya şikayəti təmin edilməyib.
İş materiallarına əsasən, hadisə 10 iyun 2023-cü il saat 11 radələrində Xaçmaz rayonu ərazisində baş verib. Belə ki, Tutu Kərimova zərərçəkmiş D.D.-nin istifadəsində olan mübahisəli bağ sahəsinə gələrək gilas yığıb. Zərərçəkmiş onun bu hərəkətinə mane olub və üzərinə su sıçradıb. Bundan sonra Tutu Kərimova hadisə yerindən götürdüyü kərpiclə D.D.-nin sol ayağına zərbə vurub, əli ilə isə boyun və sağ qol nahiyələrinə xəsarətlər yetirib. Nəticədə zərərçəkmişə sağlamlığın qısa müddətə pozulmasına səbəb olan yüngül xəsarətlər yetirilib.
Bundan başqa, 8 avqust 2023-cü il tarixdə eyni ərazidə Tutu Kərimova zərərçəkmiş S.S.-ə qarşı zorakılıq edib. İttihama görə, o, S.S.-in əvvəlki hadisə ilə bağlı polisə şahid qismində ifadə verməsini bəhanə edib. Belə ki, Tutu Kərimova onu yerə yıxaraq müxtəlif nahiyələrinə zərbələr endirib və nəticədə S.S.-ə də sağlamlığın qısa müddətə pozulmasına səbəb olan yüngül xəsarətlər yetirilib.
Xaçmaz Rayon Məhkəməsinin hökmü ilə Tutu Kərimova 7 ay müddətinə azadlığın məhdudlaşdırılması cəzasına məhkum edilib. Hökm apellyasiya qaydasında mübahisələndirilib. Sumqayıt Apellyasiya Məhkəməsinin qərarı ilə 10 iyun 2023-cü il tarixli hadisə üzrə cinayət məsuliyyətinə cəlbetmə müddəti keçdiyi üçün ona cəza təyin edilməyib. S.S.-ə qarşı törədilmiş əməl üzrə isə Cinayət Məcəlləsinin 128-ci maddəsi ilə 6 ay müddətinə azadlığın məhdudlaşdırılması cəzası saxlanılıb.
Həmin qərardan verilmiş kassasiya şikayətləri Ali Məhkəmə tərəfindən təmin edilməyib.
