Balakən rayonunda 1992-ci il təvəllüdlü Siyavuş toy məclisindən sonra şadlıq sarayının həyətində həmkəndlisi Elbəyə (adlar şərtidir – red.) xəsarət yetirib.
Demokrat.az-ın məlumatına görə, hadisə 2024-cü il oktyabrın 1-də rayonun Kortala kəndində yerləşən "Ruslan" şadlıq sarayının həyətində baş verib.
Məlumata görə, gecə saat 23 radələrində sərxoş vəziyyətdə olan Siyavuş şəxsi münasibətlər zəminində yaranmış mübahisə zamanı Elbəyin baş nahiyəsinin sol tərəfinə yumruqla zərbə endirib və ona müxtəlif dərəcəli xəsarətlər yetirib.
Siyavuş Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham olunub. O, ifadəsində dövlət qurumlarından birində nəzarətçi köməkçisi işlədiyini bildirib və hadisə zamanı Elbəyin onu təhqir etdiyini, buna görə də bir yumruq vurduğunu etiraf edib:
"Qohumum Elmanın toyunda spirtli içki qəbul etdim. Həmin vaxt həmkəndlim Elbəy sərxoş vəziyyətdə masama yaxınlaşdı, amma ona fikir vermədim. Təxminən saat 23 radələrində evə getmək üçün həyətə çıxdım. Elbəy həyətdə mənə tərəf gəldi və əl-qol hərəkətləri ilə danışmağa başladı. Saymazlıq etməsinin səbəbini soruşaraq onu itələdim və ürək ritmimi tənzimləyən cihazımın olduğunu bildirərək Elbəyi kənara çəkdim. Bu zaman o ünvanıma nalayiq ifadələr işlətdi, mən buna əhəmiyyət verməsəm də, o bir daha təhqir edəndə geri qayıdaraq onun baş nahiyəsinə bir yumruq vurdum və nəticədə o yerə yıxıldı. Daha sonra hadisə yerini tərk etdim. Özümü təqsirli bilirəm", - deyə Siyavuş törətdiyi əməldən peşman olduğunu qeyd edib.
Balakən Rayon Məhkəməsinin hökmü ilə Siyavuş 2 il 11 ay 29 gün müddətinə azadlıqdan məhrum edilib və cəzasını ümumi rejimli cəzaçəkmə müəssisəsində çəkməsi müəyyən olunub. Məhkəmə zalında həbs edilən şəxsin cəzaçəkmə müddətinin 2025-ci il mayın 15-dən hesablanması qərara alınıb.
Hökmdən verilən apellyasiya şikayəti təmin edilməyib. Şəki Apellyasiya Məhkəməsi azadlıqdan məhrumetmə cəzasının ev həbsi ilə əvəz olunması barədə vəsatəti rədd edib.
