Azərbaycan Avtomobil Yolları Dövlət Agentliyinin (AAYDA) fəaliyyəti ilə bağlı aparılan yoxlamalar çərçivəsində qurumun eks-rəhbəri Saleh Məmmədovun dövründə icra edilmiş yol layihələri araşdırmaya cəlb edilib.
Modern.az-ın məlumatına görə, hazırda yoxlanılan əksər yerlərdə ciddi texniki və icra problemləri aşkarlanıb.
Daha əvvəl də qeyd olunduğu kimi, təkcə mərkəzi Aparat deyil, rayon Yol idarələrinin rəhbərləri və məsul şəxsləru də yoxlamalara cəlb olunub.
Araşdırılan sənədlər və yerində baxışlar zamanı asfalt örtüyündə erkən dağılmalar və nahamarlıqlar, yol yatağında çökmələr və sürüşmələr, sel suları nəticəsində təkrar dağılmalar, standartlara uyğun olmayan "base" (qum-çınqıl) materialından istifadə, iri fraksiyalı çınqılın normadan artıq işlədilməsi, boru başlıqlarının normativlərə uyğun inşa edilməməsi, yol çiyinlərinin standartlara uyğun bərkidilməməsi, frezləmə işlərində keyfiyyət pozuntuları, yol yatağının qeyri-filiz materialdan inşa olunması kimi problemlər aşkarlanıb.
Yoxlamalar müxtəlif bölgələri əhatə edir. Şimal rayonlarından Quba-Xaçmaz zonası (Quba-Qonaqkənd, Susay-Xınalıq və s.), Şabran (Surra-Düz Bilici-Qorğan-Çinarlar), Bakı-Şamaxı-Yevlax istiqaməti bu siyahıya daxildir.
Məsələn, Quba-Qonaqkənd yolunda asfalt örtüyünün əksər hissəsində vaxtından əvvəl dağılmalar yaranıb, sel nəticəsində uçqunlar qeydə alınıb və bərpadan sonra yenidən dağılma baş verib.
Bəzi obyektlərdə isə işlərin yarımçıq saxlanıldığı və uzun müddət davam etmədiyi müəyyənləşdirilib.
Bu siyahı ölkə üzrə layihələrin kiçik hissəsini əhatə edir. Bununla belə, artıq aşkar edilən texniki və icra qüsurları sistemli problemlərin mövcudluğuna dair iddiaları gücləndirir.
Yoxlamaların davam edəcəyi və nəticələrdən asılı olaraq hüquqi və inzibati qərarların veriləcəyi gözlənilir. Rayon Yol idarələri rəislərinin də araşdırmaya cəlb olunması prosesin daha geniş miqyas aldığını göstərir.
Yəqin ki, araşdırmaların yekun nəticələri rəsmi qurumların açıqlamalarından sonra məlum olacaq.
