Qusardan olan Diana Bağıyevanın qrup şəklində cinsi zorakılığın qurbanı olduğu, hadisə ilə bağlı bir neçə şəxsin saxlanıldığı iddia edilir.
Məlumata görə, Diana nüfuzlu pakistanlı siyasi ailədən olan gəncin keçmiş həyat yoldaşıdır. Onların münasibətlərinin Bakıda tanışlıqdan sonra başladığı, daha sonra Pakistanda nikaha daxil olduqları bildirilir.
Məlumata əsasən, 2025-ci ilin mayında əri Diananı yenidən Pakistana aparıb. Cütlüyün birgə yaşadığı, həmin dövrdə Diananın Şabir Əhməd adlı parça taciri ilə münasibət qurduğu iddia olunur. Şabirin "Nəqaş" ləqəbi ilə tanındığı qeyd edilir. Daha sonra ərinin bu münasibətdən xəbər tutduğu və onların boşandığı bildirilir.
Boşanmadan sonra Diana ilə Şabir arasındakı münasibətlərin davam etdiyi, Şabirin onunla görüşmək üçün Bakıya gəldiyi, Diananın isə Pakistana səfərlər etdiyi iddia olunur.
Mənbənin məlumatına görə, Şabir bir müddət Diananı evində yerləşdirib və həyat yoldaşına onun geyim satışı biznesində xarici tərəfdaş olduğunu deyib. Şabirin həyat yoldaşı onları bir gün otaqda qucaqlaşarkən görüb və Diananı döyərək evdən qovub. Bundan sonra Diana qonşusu Atifin köməyi ilə Bakıya qayıdıb.
Maddi çətinliklər və işsizlik səbəbindən Diana 2026-cı ilin mayında yenidən Lahora gedib. Bu dəfə onun Şabirin dostu Tövhid Battaya müraciət etdiyi bildirilir.
İddia edilir ki, onlar Diananı fahişəliklə məşğul olmağa məcbur ediblər. Daha sonra onun qrup halında cinsi zorakılığa məruz qaldığı bildirilir.
Hadisədən sonra Tövhid Battanın "İnstagram" hesabını sildiyi və gizləndiyi iddia olunur. Pakistan hüquq-mühafizə orqanlarının Şabir Əhməd və daha üç şəxsi saxladığı, Diananın isə onu zorlayan üç kişinin adını polisə verdiyi qeyd edilir. Hazırda həmin şəxslərin saxlanılması istiqamətində araşdırma aparıldığı bildirilir.
Mənbə: Oxu.аz
