Quba rayonunda 40 yaşlı kişi həyat yoldaşına xəsarət yetirib.
Hadisə Quba rayonunun qəsəbələrindən birində baş verib. Sumqayıt şəhər sakini, 1986-cı il təvəllüdlü Elxan yaşadığı evdə həyat yoldaşı Nurcanla (adlar şərtidir - red.) mübahisə edib.
İstintaq sənədlərinə görə, şəxsi münasibətlər zəminində yaranmış mübahisə zamanı 40 yaşlı kişi həyat yoldaşının üz nahiyəsinə yumruqla qəsdən vuraraq ona xəsarət yetirib.
Elxanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Elxan ona elan edilmiş ittiham üzrə özünü təqsirli bilib. O, ifadəsində göstərib ki, hadisə günü saat 15 radələrində yaşadıqları evdə olarkən həyat yoldaşı ilə aralarında mübahisə yaranıb:
"Mübahisə zamanı əsəbləşərək Nurcanın üz nahiyəsindən yumruqla vurdum və ona xəsarət yetirdim. Mübahisə təqribən 5 dəqiqə davam etdi və həmin vaxt yanımızda kənar şəxslər olmayıb".
Təqsirləndirilən şəxs ifadəsinin sonunda əməlindən peşman olduğunu və zərərçəkmiş şəxslə barışdığını bildirib.
Quba Rayon Məhkəməsinin hökmü ilə Elxan qazancından dövlət nəfinə 10 faiz tutulmaqla 6 ay müddətinə islah işləri cəzasına məhkum edilib.
Mənbə: Demokrat.az
