Bu gün şimal rayonlarından olan şəhidlərimiz Elməddin Alxasov və Orxan Cabbarovun doğum günüdür.
Elməddin Rəsul oğlu Alxasov 1994-cü ildə Xaçmaz rayonunun Qaradağ-Buduğ kəndində anadan olub. Uşaqlıqdan hərb sənətinə maraq göstərib. Əsgərlik dövründə Murov silsiləsindəki döyüş mövqelərində xidmət edən Elməddin sərrast atıcı kimi tanınıb.
O, altı ildən artıq müddətdən artıq həqiqi hərbi xidmət hərbi qulluqçusu kimi xidmət edib. 26 yaşlı Elməddin Vətən müharibəsində Cəbrayıl və Füzuli istiqamətlərində gedən döyüşlərdə iştirak edib, daha sonra Suqovuşanın azadlığı uğrunda əməliyyatlara qatılıb.
Ailəsi ilə sonuncu dəfə oktyabrın 1-də danışıb. Həmin gün anasına ordunun Suqovuşan istiqamətində irəlilədiyini deyib. Elə həmin gecə döyüşlərdə şəhid olub.
Elməddin Alxasov oktyabrın 2-də doğulduğu Qaradağ-Buduğ kəndinin qəbiristanlığında dəfn edilib.
O, ölümündən sonra "Vətən uğrunda", "Cəsur döyüşçü", "Füzulinin azad olunmasına görə", "Xocavəndin azad olunmasına görə" medalları və III dərəcəli "Vətənə xidmətə görə" ordeni ilə təltif edilib.
Orxan Hətəm oğlu Cabbarov 29 sentyabr 1994-cü ildə Quba rayonunun Davudoba kəndində anadan olub.
Azərbaycan Ordusunun giziri olan Orxan Cabbarov 2020-ci il sentyabrın 27-də başlayan Vətən müharibəsində iştirak edib. O, Cəbrayıl, Xocavənd və Füzulinin azadlığı uğrunda gedən döyüşlərdə vuruşub.
Müharibədən sonra Orxan Cabbarov Qarabağda, Azərbaycan-Ermənistan sərhədində hərbi xidmətini davam etdirib.
2021-ci il noyabrın 16-da Ermənistan Silahlı Qüvvələrinin Kəlbəcər və Laçın istiqamətlərində Azərbaycan Ordusunun mövqelərinə hücumu zamanı döyüş tapşırığını yerinə yetirərkən şəhid olub.
Orxan Cabbarov noyabrın 18-də Qubadakı Şəhidlər Xiyabanında dəfn edilib.
O, ölümündən sonra "Cəbrayılın azad olunmasına görə", "Xocavəndin azad olunmasına görə" və "Füzulinin azad olunmasına görə" medalları, həmçinin III dərəcəli "Rəşadət" ordeni ilə təltif edilib.
