Zaqatala rayonu füsunkar dağ iqlimi, təmiz havası, zəngin meşələri və şəfalı bulaqları sayəsində Azərbaycanın uzunömürlülər diyarlarından biri kimi tanınır. Rayonda əsrlik ömür sürən onlarla sakin qeydə alınıb. Onlardan biri də 122 yaşlı, hazırda ölkəmizin ən qocaman əmək təqaüdçüsü Rubeydə Gülməmmədovadır.
Rubeydə nənə 3 övlad - 2 oğlan, 1 qız böyüdüb. Onun 6 nəvəsi, 5 nəticəsi və bir kötükcəsi var.
"Ay bala, bizim uşaqlığımız, gəncliyimiz çox ağır illərə təsadüf edib. O illər aclıq, yoxsulluq illəri idi. İnsanlar çox çalışırdı, amma günlərlə çörəyə həsrət qalırdı. Harada idi belə bu qədər yemək-içmək?" - deyir, nəfəsini dərir və əlavə edir ki, o zamanlar fındıq, ya da qozla çay içərdilər, şəkər çox az tapılardı.
Anasının onları necə böyütdüyünü xatırlayan Rubeydə nənə bildirir ki, bəkməz, qoz və fındıqdan hazırlanan qarışıqlardan daha çox istifadə ediblər.
Rubeydə nənə çox çalışqan qadın olub. Həyat yoldaşı ilə baş-başa verib çox əziyyətlər çəkiblər. 3 övladlarını da həyat yoldaşı ilə birlikdə böyüdüblər.
"Bizim uşaqlığımızdan fərqli olaraq, öz övladlarımı savadlı, dünyagörüşlü böyütməyə çalışmışıq. Həyat yoldaşımla baş-başa verib onların öncə tərbiyəli övladlar olması üçün səy göstərmişik", - deyən nənə əlavə edir ki, o zamanlar uşaqlarına ciddi tərbiyə verməsəydilər, böyüklərlə davranmağı öyrətməsəydilər, bu gün tamam başqa bir vəziyyət alınardı.
Rubeydə nənə bildirir ki, bu gün də evdə, ailədə böyüyən nəvə və nəticələrinə ağıllı övlad olmalarını, böyüklərə qayğı ilə yanaşmalarını və dərslərinə yaxşı çalışmalarını tövsiyə edir. Rubeydə nənə evindən, ailəsindən, övladlarından, nəvələrindən çox razıdır.
Təqaüd kartının kimdə olması ilə də maraqlanırıq. Nənə bir an belə tərəddüd etmədən "gəlinimdədir".
"Gəlininizi çoxmu istəyirsiniz?" sualına nənə gülümsəyərək belə cavab verdi:
"Onlarsız mənim bir günüm olmasın. Onlar mənə baxırlar. Amma əvvəlcə Uca Allah. Allah icazə verməsə, min adam belə tökülsə, xeyri yoxdur. Allahdan istə ki, "Ya Rəbbi, Sən kömək ol". Gəlinim mənə övladlarımdan daha yaxındır. O illərdir mənim əziyyətimi çəkir. Ona görə oğluma da demişəm, gəlinim mənim nəfəsim, əvəzimdir".
Rubeydə nənədən uzunömürlülüyün sirrini də soruşuruq.
"Uzunömürlülüyə gəlincə, ay oğul, iş insanın cövhəridir. Elə bu gün də işləyəndə rahat oluram. Bizim ailədə keçmişdən bəkməz, qatıq, süd, qoz-fındıq əsas qidalarımız olub. Bəlkə də sağlam qalmağımın səbəblərindən biri də bu qidaları hər zaman istifadə etməyimdir", - deyir yaşlı qadın.
Mənbə: Azərtac
