Ömrünün 40 ilini səhiyyəyə həsr etmiş tanınmış uşaq cərrahı Məhyəddin Məhəmməd oğlu Aydəmirov vəfat edib.
Shimal.News xəbər verir ki, mərhum uzun illər Sumqayıt şəhərində müxtəlif tibb müəssisələrində çalışaraq yüzlərlə uşağın sağlamlığına qovuşmasına töhfə verib.
M.Aydəmirov 1957-ci ildə Quba rayonunda anadan olub. O, 1974–1980-ci illərdə Rusiya Federasiyasının Saratov Dövlət Tibb İnstitutunun Pediatriya fakültəsində ali təhsil alıb. 1980–1981-ci illərdə Tambov vilayəti Uşaq Xəstəxanasında cərrahiyyə üzrə internatura keçib.
1981–1984-cü illərdə Tambov vilayətinin Miçurinsk şəhərində Bryuxinin adına Şəhər Xəstəxanasında fəaliyyət göstərən həkim, 1984–1993-cü illərdə isə Sumqayıt Təcili Tibbi Yardım Xəstəxanasında cərrah kimi çalışıb. Daha sonra, 2023-cü ilə qədər Sumqayıt Uşaq Xəstəxanasında uşaq cərrahı vəzifəsində fəaliyyətini davam etdirib.
