Quba rayonunda 35 yaşlı kişi həyat yoldaşına xəsarət yetirib.
Demokrat.az-ın məlumatına görə, hadisə ötən ilin iyulun 27-də rayonun kəndlərindən birində baş verib. Quba sakini, 1991-ci il təvəllüdlü İslam həmin gün saat 15 radələrində yaşadıqları evdə həyat yoldaşı Vüsalə ilə (adlar şərtidir) mübahisə edib.
Mübahisə zamanı o, həyat yoldaşının üz nahiyəsinə yumruqla zərbə endirib və qadına müxtəlif dərəcəli bədən xəsarətləri yetirib.
Faktla bağlı İslam barəsində Cinayət Məcəlləsinin 128-ci maddəsi ilə ittiham irəli sürülüb.
Məhkəmə zamanı tərəflər arasında barışıq əldə olunduğu müəyyən edilib. Bu səbəbdən Cinayət Məcəlləsinin 73.2-ci maddəsi tətbiq olunub, təqsirləndirilən şəxs cinayət məsuliyyətindən azad edilib və iş üzrə icraata xitam verilib.
