Quba rayonunun Xucbala kəndində kütləvi zəhərlənmə hadisəsi qeydə alınıb.
Zərərçəkmişlərin yaxınlarının Shimal.News-a verdiyi məlumata görə, ad günü şənliyində 20 nəfər "paytaxt" salatından zəhərlənib.
İddialara əsasən, buna səbəb kənd ərazisində yerləşən marketlərin birindən alınan və istifadə müddəti başa çatmış məhsullar olub. Zəhərlənən şəxslərdən 8-i Qusar Rayon Mərkəzi Xəstəxanasında, digərləri isə Quba Rayon Mərkəzi Xəstəxanasında müalicə alıblar.
TƏBİB-dən verilən məlumata görə, 1953-cü il təvəllüdlü N. Şabutov, 1953-cü il təvəllüdlü H. Şabutova, 1986-cı il təvəllüdlü A. Şabutova, 2003-cü il təvəllüdlü A. Şabutova, 2003-cü il təvəllüdlü N. Şabutova, 2010-cu il təvəllüdlü D. Şabutov, 2025-ci il təvəllüdlü G. Şabutova və 1978-ci il təvəllüdlü D. Məmmədova Qusar Rayon Mərkəzi Xəstəxanasının Təcili tibbi yardım şöbəsinə hospitalizasiya olunub. Onlara qida toksikoinfeksiyası diaqnozu qoyulub və zəruri tibbi yardım göstərilib.
Azərbaycan Qida Təhlükəsizliyi Agentliyindən bildirilib ki, məsələ ilə bağlı araşdırma aparılır.
Zəhərlənən şəxslərin vəziyyətləri stabildir.
