Quba şəhəri və ətraf yaşayış məntəqələri ötən gecə zibil poliqonunda tullantıların yandırılması nəticəsində yaranan qatı tüstüyə bürünüb.
Shimal.News-a müraciət edən sakinlərin sözlərinə görə, axşam saatlarından başlayan tüstü gecə saat 02:00-dək davam edib. Onlar bildiriblər ki, tullantıların yandırılması nəticəsində yayılan pis qoxulu tüstü Quba şəhərinin böyük hissəsi ilə yanaşı, Çinarlı kəndi (Alekseyevka), Zərdabi qəsəbəsi, İqrığ kəndi və Dəvədabanı yaşayış massivində də hiss olunub.
Sakinlərin sözlərinə görə, qatı tüstü səbəbindən nəfəs almaq çətinləşib. Yay aylarında pəncərə və qapıların açıq qalması isə vəziyyəti daha da çətinləşdirib.
Qeyd edək ki, redaksiyamız iyunun 29-da da zibil poliqonunda baş verən tüstülənmə ilə bağlı sakinlərin narazılığını işıqlandırıb. Quba Rayon İcra Hakimiyyəti isə cavabında bildirib ki, zibil poliqonunda yanğınların baş verməməsi üçün "Təmiz Quba" MKT tərəfindən zəruri addımlar atılır.
Sakinlər problemin yenidən təkrarlanmasından narazıdır və aidiyyəti qurumlardan poliqonda nəzarətin gücləndirilməsini, tullantıların yandırılmasının və tüstülənmənin qarşısının alınmasını tələb edirlər.
