Azərbaycan tarixinə Qanlı Yanvar faciəsi kimi daxil olan 1990-cı ilin 20 Yanvar hadisələrindən 36 il keçir. Bu qanlı əməliyyat Azərbaycan xalqını qorxutmaq və milli azadlıq hərəkatını boğmaq məqsədi ilə SSRİ rəhbərliyi tərəfindən məqsədli şəkildə həyata keçirilmiş ağır cinayət idi.
1990-cı il yanvarın 19-dan 20-nə keçən gecə Mixail Qorbaçovun əmri ilə sovet ordusu Bakıya və bir sıra rayonlara yeridildi. Dinc əhaliyə qarşı tanklar, zirehli texnika və atıcı silahlardan istifadə olundu. Nəticədə 147 nəfər qətlə yetirildi, 700-dən çox insan yaralandı, yüzlərlə şəxs həbs edildi.
Bu hadisə sovet totalitar rejiminin əsl mahiyyətini açıq şəkildə göstərdi.
20 Yanvar Azərbaycan tarixinə faciə ilə yanaşı, qəhrəmanlıq günü kimi həkk olundu. Şəhidlərin dəfnində yaşanan izdiham xalqın birliyini, milli ləyaqətini və yenilməz iradəsini bütün dünyaya nümayiş etdirdi.
Ulu Öndər Heydər Əliyevin verdiyi siyasi-hüquqi qiymət nəticəsində Qanlı Yanvar hadisələri beynəlxalq ictimaiyyətə çatdırıldı. Məhz 20 Yanvar gecəsi Azərbaycan xalqının azadlıq və müstəqillik yolunun əsası qoyuldu və bu yol müstəqil, suveren Azərbaycanın qurulması ilə nəticələndi.
