2023-cü ilin noyabr ayında İsmayıllının Lahıc və Basqal qəsəbələri arasında yerləşən, IX–XII əsrlərə aid Niyal qalası abidəsinin Qərb bürcü ərazisində qanunsuz qazıntı işlərinin aparıldığı aşkarlanıb.
Shimal.News xəbər verir ki, faktla bağlı Mədəni İrsin Qorunması, İnkişafı və Bərpası üzrə Dövlət Xidməti tərəfindən ərazinin mühafizəsi məqsədilə nəzarət tədbirləri gücləndirilib.
2025-ci ilin fevral–mart aylarında həmin ərazidə yenidən qanunsuz qazıntı aparıldığı müəyyən edilib. Aidiyyəti qurumlara məlumat verildikdən sonra qanunsuz əməli törədən şəxslər hadisə yerində saxlanılıblar.
Araşdırmalar zamanı məlum olub ki, Şahmalıyev Namiq Kamil oğlu və Novruzov Sabit Sədi oğlu qabaqcadan əlbir olaraq bir qrup şəxs halında birləşib, tamah niyyəti ilə xəzinə axtarmaq məqsədilə Niyal qalasının Qərb bürcünün hasarı boyunca qanunsuz qazıntı işləri aparıblar. Nəticədə qalanın ön hissəsindən 5,38 metr, arxa hissəsindən isə 2 metr uzunluğunda divar uçurularaq qalaya və onun müşahidə məntəqəsinə qəsdən ciddi zərər vurulub.
Faktla bağlı 11 mart 2025-ci il tarixində Baş Prokurorluq tərəfindən təqsirləndirilən şəxslər barəsində Azərbaycan Respublikası Cinayət Məcəlləsinin 246-cı maddəsi ilə cinayət işi başlanılıb. İbtidai istintaq tamamlanaraq iş 1 avqust 2025-ci ildə baxılması üçün İsmayıllı Rayon Məhkəməsinə göndərilib.
Hazırda cinayət işi üzrə məhkəmə istintaqı davam edir.
Qeyd edək ki, Cinayət Məcəlləsinin müvafiq maddəsinin sanksiyasına əsasən, təqsirləndirilən şəxslər iki ilədək müddətə azadlıqdan məhrum edilə bilərlər.
