Xaçmaz rayonunun Nərəcan kəndində elektrik təsərrüfatının yararsız vəziyyətdə olması insan həyatına təhlükə yaradır.
Bu barədə Shimal.News-a danışan sakinlər bildiriblər ki, kənd ərazisində qəzalı elektrik dirəkləri, yerə doğru sallanan naqillər və şəbəkədəki gərginliyin normadan aşağı olması yerli əhali arasında ciddi narahatlıq doğurur. Onların sözlərinə görə, kəndin elektrik infrastrukturu uzun illərdir yenilənməyib.
Kənd sakinləri bildirirlər ki, xüsusilə yağışlı və küləkli havalarda bu vəziyyətin faciə ilə nəticələnə biləcəyindən ehtiyatlanırlar. Bir çox elektrik dirəyi çürüyüb və əyilmiş vəziyyətdədir, bu isə həm piyadalar, həm də yaxınlıqdakı yaşayış evləri üçün ciddi risk mənbəyidir.
Bundan başqa, elektrik gərginliyi normadan xeyli aşağı düşür. Bu isə məişət texnikasının tez-tez sıradan çıxmasına və maddi ziyana səbəb olur.
Nərəcan kənd sakinləri dəfələrlə aidiyyəti qurumlara müraciət etdiklərini, lakin problemin hələ də həll olunmadığını deyirlər. Onlar "Azərişıq" ASC-nin əraziyə baxış keçirməsini, qəzalı dirəklərin dəyişdirilməsini və transformatorun yenilənməsini tələb edirlər.
